Schulleben, lernen & erleben

Gen-i-al Värsli von M.L.

Donnerstag, 31. Mai 2018

Gen-i-al                                         

Vieli betätige sich vielsyttig,
aber nid jedi kunnt in d’Zyttig,
denn: „Nicht jede Oma ist so coole,
dass sie noch gibt Schule“.
(Erscht rächt nid jede-n-Opa)
Ich ghör zu de geniale-n-Alte,
wo, zum sich Entfalte,
no immer göhn in d’Schuel.
Do sitz i mit de Kinder uff Bänggli und uff Stiehl,
loos, was sie dien verzelle
und was d’Lehrerin jetzt duet welle
und ha drby verschiedeni Gfiehl. 

Angscht, dass i öppis nid ka,
muess i nid ha. Hejo,
will me mir sowieso dr Altersbonus git.
Und 2er , 4er, 5er-Reihe ka-n-i no vo synerzyt.
Au Nome, Värb und Adjektiv
erkenn i blind und instinktiv.
Lääse han i neu miesse lehre
mit Bilder vo Müüler, wo sich uffspeere
und Lippe, wo sich zämmeprässe.
Ui, Nääme vo Schieler sött i au nid vergässe.
Bim Seiligumpe mergg i gly,
dass i scho mool bi besser gsi.
Drfür duets mer ame glinge
sunscht nöime yzspringe.
Und Renne duen-i keini mache,
sunscht dät i am Aend no zämmekrache.
Neui Liedtäggscht, o herrje,
muess i zerscht e paar Mool gseh.
Vorlääse  und Gschicht verzelle,
isch das, was i am liebschte wurd welle.
Fähler find i gly zum Korrigiere.
Farb ariere, Altpapier abfiere,
Tafele putze, Tischli schrubbe,
au das duet mi nid schiniere.
Und ohalätz, s’git au emool e Pflaschter uff e Blätz.
Däm, wo het vergässe ans Nastiechli z’dängge,
muess i halt wieder emool eins schängge.
Wenn ab und zue e Schueh duet verschwinde,
hilf i drby, dä wiederzfinde.
Und wenn eins duet hüüle wäge-n-ere Büüle
duen i die mit Wasser kühle. 

In aller Bescheideheit sygs do gseit:
I glaub, me ka mi bruuche
fürs Fyne und fürs Ruuche.
Und wemmer d’Kinder gänd
en ehrlig Komplimänt
gang i zfriede hei am Aend. 

ML/Mai  2018